வணக்கம் நண்பர்களே..

இது ஒரு புது முயற்சி..

திருக்குறளை புதுக்கவிதை வடிவத்தில் இயற்ற முயற்சித்துள்ளேன்..

அதன்  தொடக்கமாக முதல் அதிகாரத்தை வடித்துள்ளேன்..

விமர்சனங்களுக்கு செவி சாய்க்கிறேன்..

பாராட்டுக்களுக்கு தலை வணங்குகிறேன்.. 

அதிகாரம் 1 : கடவுள் வாழ்த்து.

குறள் 1:

    அகர முதல எழுத்தெல்லாம் ஆதி
    பகவன் முதற்றே உலகு. 

 புதுக்கவிதை நடையில்..

உன் தொடக்கம்

பெற்றோரே - அவர் 

கோல் தொடக்கம் 

அகரமே.. 

எண் தொடக்கம் 

ஒன்றே - அனைத்தின் 

முன் தொடக்கம் 

இறையே..!!

****

குறள் 2:

    கற்றதனால் ஆய பயனென்கொல் வாலறிவன்
    நற்றாள் தொழாஅர் எனின்.


 புதுக்கவிதை நடையில்..

எண்ணால் எழுத்தால் - ஏனைய

பட்டறிவால் உயர்ந்தென்ன 

உன்னிலும் கற்றவன் - தாள் 

வணங்காதபோது...

****

குறள் 3:

    மலர்மிசை ஏகினான் மாணடி சேர்ந்தார்
    நிலமிசை நீடுவாழ் வார்.

 புதுக்கவிதை நடையில்..

கட + உள்

உள்ளத்தைக் கடந்தவனது  

தாளில் பணிக்கும்  

மலரிலும் உள்ளவன்  

இறைவன்.. 

அவனை  

உள்ளத்தில் வடித்து - தினம் 

தொழும் மனம் 

பூவுலகிலும்  மூவுலகிலும்  

நீண்டு வாழும்...!! 

****

குறள் 4:

    வேண்டுதல் வேண்டாமை இலானடி சேர்ந்தார்க்கு
    யாண்டும் இடும்பை இல.

 புதுக்கவிதை நடையில்..

எக்காலத்தும் துறத்தும்  

பிறவித் துன்பங்களை  

அகற்ற..

விழைதலும் வெறுத்தலும் இலா 

முக்காலமும் துறந்த - இறைதாளைப்  

பற்று..!

****

குறள் 5:

    இருள்சேர் இருவினையும் சேரா இறைவன்
    பொருள்சேர் புகழ்புரிந்தார் மாட்டு.

 புதுக்கவிதை நடையில்..

இறை புகழை

அகத்தில் பதித்தால் - தனக்கு 

அகிலத்தில் அறியாமை ஊட்டும் 

இருவினையாம் - நல்வினையும் 

தீவினையும் தீண்டாது...!

**** 

குறள் 6:

    பொறிவாயில் ஐந்தவித்தான் பொய்தீர் ஒழுக்க
    நெறிநின்றார் நீடுவாழ் வார்.

 புதுக்கவிதை நடையில்..

ஐம்புலன் வேட்க்கை அழித்து - பரம்பொருளின் 

பொய்யற்ற நெறியில் 

வாழ்பவன் - மாண்டாலும் 

மண்ணுள்ளவரை வாழ்வான்...!

****

குறள் 7:

    தனக்குவமை இல்லாதான் தாள்சேர்ந்தார்க் கல்லால்
    மனக்கவலை மாற்றல் அரிது.

 புதுக்கவிதை நடையில்..

நீங்காது மனக்கவலை - உன்னை 

படைத்த பரம்பொருளைப்  

பற்றாதிருந்தால்..!

**** 

குறள் 8:

    அறவாழி அந்தணன் தாள்சேர்ந்தார்க் கல்லால்
    பிறவாழி நீந்தல் அரிது.

 புதுக்கவிதை நடையில்..

பரம்பொருளைப் பற்றித்  

துணை கொண்டோர்  

நீந்திக் கடப்பர் - பிறவிப் 

பெருங்கடல்..!

****

குறள் 9:

    கோளில் பொறியின் குணமிலவே எண்குணத்தான்
    தாளை வணங்காத் தலை.

 புதுக்கவிதை நடையில்..

முடமுற்ற ஐம்பொறிகளின் பயனெதுவோ  

பொருளதுவே - தன்னை 

படைத்த பரம்பொருளை வணங்கா 

தலைக்கும்..!

**** 

குறள் 10:

    பிறவிப் பெருங்கடல் நீந்துவர் நீந்தார்
    இறைவன் அடிசேரா தார்.

 புதுக்கவிதை நடையில்..

வாழ்கைச் சுழலில் சிக்கித் 

தவிப்பர் - பரம்பொருளைப்  

பற்றாதவர்.. 

நீந்திக் கடப்பர் - உள்ளத்தைக் 

கடந்தவனை - உள்ளத்தில்

கொண்டவர்..!!

****

பிழைகளுக்கு மன்னிக்கவும்..
தொடரலாமா வேண்டாமா என்ற உங்கள் கருத்துக்களையும் பதியவும்..

*** நன்றி ***

-- Edited by Manikandan on Monday 18th of March 2013 05:43:37 PM