குளிர் தளிர்க்கும் வெளிர் பச்சையில் இளங்கொடி

படர்ந்திருக்கும் அடர் பச்சையில் ஆயிரம் கதிரடி

காலச் சதிரில் முதிர் இலை கொஞ்சம் உதிர்ந்தபடி

பச்சை பசுமை பெற்றிங்கே பாதையெங்கும் பாயுதடி...

ஆவணியில் அதிர்ந்துருகிய மேக மடி

வெட்டாற்றில் பாயும் குறு வெள்ளமடி

அணைக்கருகே அமைந்த படி

அதில் நானும் அமர்ந்த படி

உடல் கூறின் உயிர்ப் பெருக்க

உஷ்ணக் கூறின் கருவறுக்க

ஊறும் குளிர் ஓடையடி

உருகும் வெப்பத்தில் என்னுயிரும் உறையுதடி

அசையும் தெப்பத்தில் என் காலில் மீன்கடி

உள்ளங்கால் ஊறலில்

என் உச்சந் தலைமுடி 

நட்டு நிக்குதடி...

இது ஓடை சூழ்ந்த காடுகளா..¡

மனித வாடை இல்லா வீடுகளா..¡

ஊரடங்கு உத்தரவாய்

நிலவும் நிசப்தங்களா...¡

இடை இடையே இடைஞ்சலாய்

இது என்ன..?

பூ மலரும் சப்தங்களா...¡

வளி வழியெங்கும்

இழுத்து வரும் சருகுகளா..¡

இல்லை 

விட்டு விட்டு கிடைக்கும்

தொலைத் தொடர்பின்

அலை பேசியின் அழைப்புகளா...¡

அமைதி என்னும் ஆளுமை அழகாக ஆடுதடி

ஆறோட ஓடைத் தண்ணீர் வீதி வழி ஓடுதடி

வாய்ப்பு ஒன்று இருந்துவிட்டால் 

வந்திங்கே கூடுமடி..¡

என்னைத் 

தோண்டிப் புதைத்தாலும்–தீ

தீண்டி எரித்தாலும்

அது இவ்வூரா இருக்க மனம் வேண்டுமடி....

இது இயற்கை அடவுகட்டி

ஆடும் அழகான அடவங்குடி....¡

நன்றி

உங்களுக்காக பிரார்த்திக்கிறேன்....